መጨከክ
(አሳዬ ደርቤ)
ከሰባት ሰማይ ስር ካለ ጎጆ መሃል
ማጣት፣ መንጣት እንጂ… 
ኦናነት ታቅፎ -አይቻልም መጉደል፡፡
.
ልክ እንደ ማረሻው- እንደ መኮትኮቻው
አንገቱን ቀልብሶ ምነው ሆዴን በላው?
የሰለብኩ ይመስል ቆሎውን ከቃጢው፡፡
እንዲህ ነው ሲታጣ- እንዲህ ነው ሲቸግር
ቁራሽ አልባ ሰፌድ- ጥሬ ያጣ ሴደር
የቆፈነው መዳፍ- እንጨት መሰል እግር
የተጠማ እንስራ- ያቀረቀረ አንገት
ምድርን የሚወቅስ- ስቃይ ያዘለ ፊት፤
.
አሁን እግር ጥሎህ ከጎጆው ብትከትም
እግዜሩን አይወቅስም፣ መንግስቱን አያማማም
ቢጠናም ቀኑን ነው- አቀርቅሮ 'ሚረግም፡፡
ግና እንደምታዬው…
ከኩበት ኩይሳው- ከወናው ሙሃቻ
ከአመዱ መሃከል- ከምዳጃው ዳርቻ
መንግስት ተዠርፍጧል- በአምሳለ ጉልቻ
ቁናው ጥሬ ሲይዝ- ‹‹ግብር አምጣ›› ብቻ!
እዚህ ጉልቻ ላይ ወረቀት ይጣዳል
ሪፖርት ተሰፍቶ እንጎቻ ይሆናል፡፡
ከዚያም…
ቁና ሙሉ ቁጥር- አሃዝ ተደምሮ
የተሰጠው አባት-ያው'ና አቀርቅሮ
በረመጥ አገር ላይ እሳት ተቸግሮ፡፡
.
ዋናው ማምከን እንጂ- አብዝቶ መበደል
እንደ እንቅብ፣ ሞሰቡ- ምድጃው ጭር ሲል
ለካስ አንደ ዶሮ- ሰው'ም ይጨክካል፡፡