ጀግና እወዳለሁ!
ጀግና እወዳለሁ!
«ዘውድአለም ታደሰ»
ጀግና እወዳለሁ ተኳሽም አልጠላ
ሲደክመኝ አርፋለሁ ከጎፈሬው ጥላ!
ብላለች የሃገሬ ገጣሚ! ጀግና እወዳለሁ .... አላማ ያለው፣ የሞትን ፍርሃት አሸንፎ ቀና ብሎ የሚኖር ፣ በፈተና የማያጎነብስ ፣ መከራ ወኔውን የማይሰልበው ፣ እስከመጨረሻዋ እስትንፋሱ የሚታገል ፣ ጀግና እወዳለሁ!
ኢብራሂም አቡ ዙሪያ አለማችን ካፈራቻቸው ጀግኖች አንዱ ነው! አለም ስለጀግንነቱ ባይዘምርለትም የፓለስታይን ህዝብ ስሙን ዘልአለም የሚያወድሰው ፣ ለሐገር የሚከፈለውን የመጨረሻውን ፅዋ ጨልጦ ለብዙዎች የሞራል ስንቅ ሆኖ ያለፈ የፅናት ተምሳሌት ነው የነፃነት አርበኛው ኢብራሂም ኡቡ ዙሪያ!!
ሁለት እግሮቹን ያጣው ከእስራኤል ታጣቂ ወታደሮች ጋር ለነፃነቱ ሲታገል ነው! ነገር ግን ጥይቱ እግሩን እንጂ ወኔውን አላስጣለውም ነበር። ሁሉን ነገር እርግፍ አርጎ ትቶ ለልመናም እጁን አልዘረጋም! ቤተሰቡን መኪና በማጠብ እያስተዳደረ ጎን ለጎን ደግሞ ከወገኖቹ ጋር ትግሉን ቀጠለ!
ሮጦ ማምለጥ ባይችልም ጥይት እንደዝናብ የሚወርድበት ቅልጥ ያለ ጦርነት ውስጥ ይቀላቀላል ፣ በእጁ እየዳኸ በእሳት መሃል እየተሽሎከለከ ፣ ዊልቸሩን እየጎተተ ከታጠቁ ወታደሮች ጋር ይተናነቃል! የሃገር ፍቅር ልክፍት እንዲህ ነዋ! የአላማ ፅናት ይሄ ነዋ! የጀግና ተግባር ይሄ ነዋ!
ኢብራሂም ትናንት ከእስራኤል ወታደሮች በተተኮሰ ጥይት ተመትቶ ወደቀ!! ፓለስታይን በሃዘን አነባች ፣ ለሚሊየኖች የፅናት ምልክት የሆነው ሃያል ሰው ወደቀ! መከራና ፈተና ፣ የአካል መጉደልና ችግር ሊጥለው ያልቻለው ፅኑእ ታጋይ ወደቀ! ትናንት አካሉን ፣ ዛሬ ደግሞ ነፍሱን ለሃገሩ ሰጥቶ በየክፍለዘመኑ አንዴ የሚፈጠረው ኢብራሂም አቡ ዙሪያ የሚወዳት ሃገሩ ላይ ዳግም ላይመለስ .... ወደቀ!!
ጀግና እወዳለሁ !
Amharic