አሁን በቀደምለት ማንትስ ወረዳ ምንትስ ክልል 
‹‹ሰፌድ ይዞ ወርዶ ወርቅ ያበጥር ህዝቡ›› 
የሚል ማስታወቂያ ለህዝቡ አነበቡ 
ይህንን ሰምቸ ወደናቴ ማጀት ዘልየ ብገባ 
የንጀራ ሰፌዱን ጥቀርሻ ወርሶታል 
እንኳን ‹‹የሰማይ ላም›› ድሮ ያበጥረው ቆሎ እንኳ ናፍቆታል !!

ተመስገን ነው መቸም ….
እኒህ ጠቅላያችን በዚህ ከቀጠሉ 
በቀጣይ ስብሰባ ጀሪካ ይዛችሁ 
ምንትስ ክልል ነዳጅ ቅዱ ቢሉ
ያው የሳቸው ነገር ምኑ ይታወቃል 
በሚል ጥርጣሬ….ወርቁ ያመለጠው 
በርሚል አዘጋጅቶ ድፍድፍ ይጠብቃል !

አንዳንድ ነዋሪዎች ‹‹ለዜና ምንጫችን›› እንዳሉት ከሆነ 
ህዝባችን በሙሉ እንደሳጋቱራ ወርቅ ከዘገነ 
ስስታም ሸቃጮች እንጀራ ሚሸጡ 
ሳጋቱራ ትተው የጤፍ እንጀራ ላይ ወርቅ እንዳይቀይጡ 
የፌዴራል ፖሊስ የወርቅ ጠመንጃ ከወርቅ ዱላ ጋ ለትጥቅ አሰርቶ
ይከታተልንን የገቡበት ገብቶ !! 
ሲሉ አሳስበዋል!!

ሌላ ከታማኝ ምንጭ የወጣ መረጃ 
እጣው የዘገየው የጋራ መኖሪያ የብረት ደረጃ 
በወርቅ እስኪለበጥ ነው የሚሉም አሉ 
እኔ ምን አውቃለሁ …. ብቻ የሰማሁትን ይሄው እፅፋለሁ!

እና ውድ ወዳጀ አሌክስ የትላንቱ
ድፍን አገራችን ድፍን ብናኝ ወርቅ ተሞልቶ 
ያስነጥሰን ይዟል በምኞት አፍንጫ ሳንፈቅድለት ገብቶ

በዚህ ደብዳቤ ውስጥ ፖስታውን ስትከፍት 
ድንገት ቢቦንብህ የወርቅ አቧራ 
ያው ፖስታ ቤታችን ባለመፀዳቱ ሊሆን ስለሚችል 
‹‹ለመልካም ገፅታ›› ለማንም አታውራ !
አደራ !
አደራ !